كم عدد نعطي للقاعة؟
باسل ونانسي، من جايين
القاعة بتحاسب عالشخص، والعدد اللي بتعطوه هو اللي بتدفعوا عليه. إذا عطيتوا رقم كبير، بتدفعوا على كراسي فاضية. وإذا عطيتوا رقم صغير، بتخافوا ما يكفّي. بهالدليل منحكي كيف بتوصلوا لرقم منطقي، من تجربتنا.
كيف القاعات بتحاسب؟
- بالعادة سعر للشخص الواحد، مع حد أدنى بتتفقوا عليه بالعقد.
- بتدفعوا على العدد اللي عطيتوه للقاعة، حتى لو إجا أقل منه.
- كل قاعة إلها موعد لما بتطلب العدد النهائي، فاسألوا عنه من الأول.
المعزومين مش هني الجايين
عدد الكروت اللي وزّعتوها مش هو العدد. كرت واحد ممكن يكون لشخص أو لعيلة، ومش كل اللي انعزموا جايين.
الرقم اللي بيهمّ هو عدد الأشخاص اللي أكّدوا إنهم جايين. ولهيك أول خطوة إنكم تجمعوا الردود.
وزّعتوا كروت العرس، كيف بتعرفوا مين جاي؟العدد بيتغيّر لآخر لحظة
حتى بعد ما تجمعوا الردود، العدد مش نهائي. في ناس بيأكّدوا إنهم جايين، وبيصير معهم ظرف طارئ آخر لحظة. ومرّات بتصير وفاة بعيلة، فبتغيب العيلة كلها.
وبالعكس كمان: في ناس بيقولوا مش جايين، وبيغيّروا رأيهم وبيجوا بليلة العرس.
يعني الرقم اللي بتعطوه للقاعة تقدير، مش حساب دقيق. وهون بتفيد الزيادة اللي القاعة بتحضّرها.
طيب، كم نعطي؟
- عدّوا الأشخاص اللي أكّدوا إنهم جايين، مش الكروت.
- بالعادة القاعة بتحضّر زيادة عن العدد اللي بتعطوها ياه، تقريبًا 15%، وبتلاقي مطرح للي بيجوا زيادة.
- فما تزيدوا عالعدد "احتياط". بالعكس: إذا أكّدولكم 400، اعطوا القاعة رقم أقل بشوي، متل 380. الزيادة اللي القاعة بتحضّرها بتغطّي الفرق، وبيضل عندكم مجال.
- تأكدوا إنه الرقم مش أقل من الحد الأدنى بالعقد، لأنه بكل الأحوال بتدفعوا عليه.
أسئلة اسألوها للقاعة قبل ما توقّعوا
- كم سعر الشخص، وشو الحد الأدنى؟
- إيمتى لازم نعطيكم العدد النهائي؟
- كم زيادة بتحضّروا عن العدد اللي منعطيكم ياه؟
- شو بصير إذا إجا أكتر من العدد؟ وكيف بتعدّوا الضيوف بالليلة؟
- بنقدر نغيّر العدد بعد ما نعطيكم ياه؟
العدد قدامكم أول بأول
مع جايين، الردود بتنعدّ لحالها: مين جاي ومع كم شخص. وقبل العرس بتطلعوا تقرير بعدد الحاضرين وبتبعتوه للقاعة.