وزّعتوا كروت العرس، كيف بتعرفوا مين جاي؟
باسل ونانسي، من جايين
خلصتوا توزيع الكروت بيت بيت. السؤال اللي بيجي بعدها: مين جاي فعلاً، ومع كم شخص؟ بهالدليل منحكي ليش الكرت لحاله ما بيجاوب عهالسؤال، وكيف بتجمعوا الردود بدون ما تتصلوا بكل الضيوف.
ليش الكرت لحاله ما بيكفي؟
الكرت بيوصل لكل بيت، بس ما بيرجع منه رد. بتضلّوا مش عارفين مين جاي ومين لا، وكم شخص من كل بيت.
وكرت واحد ممكن يكون لشخص واحد أو لعيلة كاملة، فعدد الكروت ما بيحكيلكم كم كرسي بدكم.
والعدد هاد مش تفصيل: عليه بتحكوا مع القاعة، وعليه بترتّبوا الطاولات.
شو بيعملوا الناس اليوم؟
- بيتصلوا بالضيوف واحد واحد، وبتتقسم القائمة على الأهل والإخوة.
- بيكتبوا الردود على ورق أو بملف، وكل واحد عنده نسخة.
- أو بيخمّنوا حسب أعراس قبل، وبيتمنّوا يطلع الحساب صح.
كل طريقة من هدول بتمشي لحد معيّن، بس بتاخد وقت، وبسهولة بتضيع فيها ردود.
كيف بتجمعوا الردود بدون ما تتصلوا بكل واحد
- وانتو بتكتبوا أسامي الكروت، اكتبوا جنب كل اسم رقم تلفون. هاد أهم اشي، ومنه بيبلّش كل الباقي.
- بعد ما تخلصوا توزيع الكروت، ابعتوا لكل ضيف رسالة قصيرة عالواتساب يأكّد فيها إذا جاي ومع كم شخص.
- اسألوا عن عدد الأشخاص، مش بس جاي أو لا. هيك بتعرفوا العدد الحقيقي، مش عدد الكروت.
- اللي ما ردّوا، ذكّروهم مرة. وبعدها اتصلوا بس باللي بعدهم ما ردّوا.
- سكّروا العدد قبل ما القاعة تطلب العدد النهائي.
رسائل للنسخ
إذا بدكم تبعتوا الرسائل لحالكم، هاي نصوص قصيرة بتغيّروا فيها الأسماء والتفاصيل.
مرحبا [اسم الضيف] 🤍 إن شاء الله وصلكم كرت عرس [اسم العريس] و[اسم العروس] يوم [التاريخ]. ممكن تأكدولنا إذا جايين ومع كم شخص، لنرتّب الطاولات؟
مرحبا [اسم الضيف]، حبينا نذكّركم بعرس [اسم العريس] و[اسم العروس] يوم [التاريخ]. إذا بتقدروا تأكدولنا إذا جايين ومع كم شخص 🤍
من تجربتنا
لما كنا نحضّر لعرسنا، دوّرنا على أداة عربية سهلة تساعدنا نعرف مين جاي عسهرتنا بدون ما ندفع آلاف الشواقل، وما لقينا. فعملنا جايين.
خلّوا جايين تجمعلكم الردود
بعد ما توزّعوا الكروت، منبعت لكل ضيف رسالة باسمه عالواتساب، وهو بيرد بكبسة: جاي، مع كم شخص، أو معتذر. اللي ما ردّوا بتوصلهم رسالة تذكير، وانتو بتشوفوا العدد قدامكم أول بأول.